96-modda. Byudjetnoma

Byudjetnoma — erishilgan natijalar hisobga olingan holda mamlakatni kelgusi davrda ijtimoiy-iqtisodiy rivojlantirishning asosiy yo'nalishlarini nazarda tutuvchi hujjat bo'lib, ushbu yo'nalishlar asosida Davlat byudjeti to'g'risidagi qonun loyihasi ishlab chiqiladi. Byudjetnoma quyidagilarni o'z ichiga oladi: O'zbekiston Respublikasi konsolidatsiyalashgan byudjetining loyihasini ishlab chiqishda foydalanilgan asosiy makroiqtisodiy ko'rsatkichlarning o'rta muddatli davr uchun prognozini; O'zbekiston Respublikasi konsolidatsiyalashgan byudjetining joriy yildagi ijrosining prognoz bahosini; yangilangan Fiskal strategiyani; prognoz yil uchun Davlat byudjetining va davlat maqsadli jamg'armalari byudjetlarining, O'zbekiston Respublikasi Tiklanish va taraqqiyot jamg'armasi daromadlari hamda xarajatlarining loyihasini va kelgusi ikki yil uchun byudjet mo'ljallarini; sohalar bo'yicha rivojlanishning asosiy yo'nalishlari, maqsadlari, vazifalari, sifat va miqdor ko'rsatkichlarini; davlat qarzining holati to'g'risidagi ma'lumotlarni, shuningdek O'zbekiston Respublikasi nomidan va O'zbekiston Respublikasining kafolati ostida jalb qilinadigan qarz mablag'larining yillik cheklangan miqdorini.