70-modda. Кредиторларнинг талаблари тўлиқ қаноатлантирилмаганлиги сабабли субсидиар жавобгарлик

Агар юридик шахснинг тўловга қобилиятсизлиги шу юридик шахс учун мажбурий кўрсатмалар бериш ҳуқуқига эга бўлган муассис (иштирокчи) сифатидаги шахснинг ёки юридик шахс мол-мулки эгасининг ёхуд қарздорнинг ишларини бошқарувчи шахснинг ғайриқонуний ҳаракатлари туфайли юзага келган бўлса, юридик шахснинг мол-мулки етарли бўлмаган тақдирда бундай шахс зиммасига унинг мажбуриятлари бўйича субсидиар жавобгарлик юклатилиши мумкин. Бошқа ҳолатлар исботланмагунига қадар суд ҳужжати билан белгиланган қуйидаги ҳолатлар ғайриқонуний ҳаракатлар туфайли кредиторлар талабларини тўлиқ қаноатлантиришни имконсиз қилиб қўйган деб ҳисобланади: агар қарздорнинг ишларини бошқарувчи шахс фойдасига ёхуд ушбу шахс томонидан қарздорнинг бир ёки бир нечта битимларини (бундай битимлар ушбу шахснинг кўрсатмасига кўра тузилган бўлса), шу жумладан ушбу Қонуннинг 6-бобида назарда тутилган битимларни тузиш натижасида кредиторларнинг мулкий ҳуқуқларига жиддий зарар етказилган бўлса; сохта тўловга қобилиятсизлик, тўловга қобилиятсизликни яшириш ёки қарздорни қасддан тўловга қобилиятсизликка олиб келиш аломатлари бенефициарлар ва аффилланган шахсларнинг биргаликдаги хатти-ҳаракатлари билан аниқланганлиги тўғрисида суднинг қонуний кучга кирган қарори мавжуд бўлса; қарздорнинг ишларини бошқарувчи шахсларни қонунчилик ҳужжатларини бузганлиги учун жавобгарликка тортиш тўғрисида суд ҳужжати қабул қилинганлиги муносабати билан юзага келган қарздорлик кредиторлар талаблари реестрига киритилган талаблар умумий миқдорининг етмиш фоизидан ошган бўлса. Агар қарздорнинг ишларини бошқарувчи бир нечта шахснинг ғайриқонуний ҳаракатлари кредиторларнинг талабларини тўлиқ қаноатлантиришни имконсиз қилиб қўйса, бундай шахслар солидар тартибда субсидиар жавобгар бўлади. Агар субсидиар жавобгарликка тортилган шахс қарздор фаолиятига ҳал қилувчи таъсир кўрсатганлиги исботланмаган бўлса, суд шахсни судбсидиар жавобгарликдан озод қилиши ёки жавобгарлик миқдорини камайтириши мумкин. Қарздорнинг ишларини бошқарувчи шахснинг субсидиар жавобгарлиги миқдори кредиторларнинг талаблари реестрига киритилган талаблар суммаси билан тугатиш массаси ўртасидаги фарққа тенг бўлади. Агар қарздорнинг ишларини бошқарувчи шахснинг субсидиар жавобгарлиги миқдори бундай шахснинг айби билан кредиторларнинг мулкий ҳуқуқларига етказилган зарар миқдоридан кам эканлиги исботланган бўлса, ушбу бошқарувчи шахс ҳисобидан қаноатлантирилиши лозим бўлган талаблар миқдори тегишли равишда камайтирилиши мумкин. Агар юридик шахснинг тўловга қобилиятсизлиги шу юридик шахс учун мажбурий кўрсатмалар бериш ҳуқуқига эга бўлган муассиснинг (иштирокчининг) ёки юридик шахс мол-мулки эгасининг ғайриқонуний ҳаракатлари туфайли юзага келган бўлса, ушбу шахслар қарздорнинг кредиторлари олдидаги мажбуриятлари қаноатлантирилгунига қадар қарздор раҳбари ва (ёки) бошқа юридик шахс муассислари (иштирокчиси) ёки мулкдори сифатида иштирок этишга ҳақли эмас.