221-modda. Жисмоний шахс кредиторларининг талабларини қаноатлантириш тартиби

Кредиторларнинг жорий тўловларга доир талаблари жисмоний шахсни тўловга қобилиятсиз деб топиш тўғрисидаги ариза қабул қилингунига қадар юзага келган талабларга нисбатан устунликка эга бўлади ва бу талаблар навбатдан ташқари қаноатлантирилади. Кредиторларнинг жорий тўловларга доир талаблари қуйидаги тартибда қаноатлантирилади: биринчи навбатда — алиментлар тўлаш, жисмоний шахснинг тўловга қобилиятсизлиги тўғрисидаги ишга оид суд харажатлари, молиявий бошқарувчига, жисмоний шахснинг тўловга қобилиятсизлиги тўғрисидаги иш бўйича ўз зиммасига юклатилган мажбуриятларни таъминлаш учун молиявий бошқарувчи томонидан жалб этилган шахсларга ҳақ тўлаш билан боғлиқ бўлган жорий тўловлар; иккинчи навбатда — меҳнатга оид муносабатлар билан боғлиқ бўлган жорий тўловлар; учинчи навбатда — коммунал тўловлар, шунингдек кўп квартирали уйларни бошқариш бўйича уй-жой мулкдорларининг ширкатларига тўланадиган мажбурий тўловлар; тўртинчи навбатда — бошқа жорий тўловларга доир талаблар қаноатлантирилади. Кредиторларнинг жорий тўловларга доир битта навбатга тааллуқли бўлган талаблари календарь навбат тартибида қаноатлантирилади. Кредиторлар талабларининг реестрига киритилган талаблар қуйидаги тартибда қаноатлантирилади: биринчи навбатда — фуқароларнинг ҳаётига ёки соғлиғига зарар етказганлик учун жавобгарлик бўйича талаблар, шунингдек алиментлар ундиришга доир талаблар; иккинчи навбатда — меҳнатга оид муносабатлардан келиб чиқадиган талаблар; учинчи навбатда — бошқа кредиторларнинг талаблари. Кредиторлар билан ҳисоб-китоблар ушбу Қонуннинг 150 ва 154-моддаларида белгиланган тартибда амалга оширилади. Гаров нарсасини сотишдан тушган пул маблағлари кредиторларнинг гаров билан таъминланган талабларини қаноатлантиришга йўналтирилади. Гаровга қўйилган мулк сотилганидан кейин кредиторларнинг гаров билан таъминланган талаблари тўлиқ қаноатлантирилганидан сўнг қолган қисми тугатиш массасига киритилади. Гаров нарсасининг қиймати ҳисобидан қаноатлантирилмаган, жисмоний шахснинг мол-мулки гарови билан таъминланган мажбуриятлар кредиторларнинг учинчи навбатдаги талаблари таркибида қаноатлантирилади. Агар қарздорнинг барча мол-мулки гаров бўлса ва (ёки) қарздорнинг мол-мулклари кредиторларнинг талабларини тўлиқ ҳажмда қаноатлантириш учун етарли бўлмаса, гаров нарсасини сотишдан тушган пул маблағлари қуйидаги тартибда тақсимланади: кредиторнинг биринчи ва иккинчи навбатдаги талабларини қаноатлантириш учун, бироқ пул маблағларининг ўн фоиздан ортиқ бўлмаган қисми доирасида; молиявий бошқарувчига ҳақ тўлаш, бошқарувчи томонидан жалб этилган шахсларнинг хизматларига ҳақ тўлаш ва гаров нарсасини сотиш билан боғлиқ харажатлар, шунингдек суд харажатларини ҳамда бошқа жорий тўловларнинг ўрнини қоплаш, бироқ пул маблағларининг ўн фоиздан ортиқ бўлмаган қисми доирасида қоплаш учун; қолган пул маблағлари кредиторларнинг гаров билан таъминланган талабларини қаноатлантиришга йўналтирилади. Кредиторларнинг жисмоний шахснинг мол-мулки етарли эмаслиги сабабли қаноатлантирилмаган талаблари қаноатлантирилган деб ҳисобланади, бундан ушбу Қонунда назарда тутилган ҳоллар мустасно.