66-modda. Pensiyalar to'lash uchun ajratiladigan mablag'lar

Ushbu Qonunga muvofiq tayinlangan pensiyalarni to'lash Pensiya jamg'armasi mablag'lari hisobidan amalga oshiriladi. Pensiya jamg'armasini shakllantirish tartibi O'zbekiston Respublikasining qonunchiligi bilan belgilanadi. Pensiyalarni to'lash uchun Pensiya jamg'armasiga O'zbekiston Respublikasi Davlat byudjetidan transfertlar ajratilishi mumkin. Mulkchilik shaklidan qat'i nazar, korxonalar va tashkilotlar: boquvchisini yo'qotganlik uchun, shuningdek xodimning mehnat vazifalarini bajarishi bilan bog'liq holda mehnatda mayiblanganligi yoki kasb kasalligiga uchraganligi oqibatidagi nogironlik uchun; xodim ushbu Qonunning 7-moddasida nazarda tutilgan pensiya yoshiga to'lguniga qadar mazkur Qonun 12-moddasining «b» bandiga muvofiq tayinlangan pensiyalarni to'lash xarajatlarining o'rnini qoplovchi pulni ish haqi to'lashga mo'ljallangan mablag'lar hisobidan Pensiya jamg'armasiga o'tkazadi. Pensioner ushbu Qonunning 7-moddasida nazarda tutilgan yoshga to'lguniga qadar ushbu Qonunning 14-moddasiga muvofiq tayinlangan pensiyalarni to'lash Pensiya jamg'armasiga ajratiladigan O'zbekiston Respublikasi Bandlikka ko'maklashish davlat jamg'armasi mablag'lari hisobidan amalga oshiriladi.