13-modda. Jinoyat ishlarini hay'atda va yakka tartibda ko'rib chiqish

Jinoyat ishlari hay'atda ko'riladi, Jinoyat kodeksi 15-moddasining ikkinchi — to'rtinchi qismlarida nazarda tutilgan jinoyatlar to'g'risidagi ishlar esa, sudya tomonidan yakka tartibda ko'riladi. Agar sudya tomonidan yakka tartibda ko'rib chiqilayotgan jinoyat ishi bo'yicha sud muhokamasi vaqtida Jinoyat kodeksi 15-moddasining beshinchi qismida nazarda tutilgan jinoyatlar sodir etilganligini ko'rsatuvchi holatlar aniqlansa, ishning ko'rilishi uni yakka tartibda ko'rib chiqishni boshlagan sudya tomonidan davom ettiriladi. Ish birinchi instantsiya sudi tomonidan hay'atda ko'rilganda sud tarkibiga sudya va ikki nafar xalq maslahatchisi kiradi. O'zbekiston Respublikasi Oliy sudi ishlarni uch nafar sudyadan iborat tarkibda ko'rib chiqadi. Odil sudlovni amalga oshirishda xalq maslahatchilari sudyaning barcha huquqlaridan foydalanadilar. Ular sud majlisida ishni ko'rish jarayonida kelib chiqadigan hamma masalalarni hal qilishda va hukm chiqarishda raislik qiluvchi bilan teng huquqqa egadirlar. Tegishli sud hay'atlarida apellyatsiya, kassatsiya va taftish tartibida ishlarni ko'rish uch nafar sudyadan iborat tarkibda amalga oshiriladi. O'zbekiston Respublikasi Oliy sudining hukmlari ustidan apellyatsiya, kassatsiya yoki taftish tartibida berilgan shikoyatlar (protestlar) O'zbekiston Respublikasi Oliy sudining Jinoyat ishlari bo'yicha sudlov hay'atida besh nafar sudyadan iborat tarkibda ko'rib chiqiladi. O'zbekiston Respublikasi Oliy sudining Rayosatida — Rayosat a'zolarining ko'pchiligi hozir bo'lgan taqdirda ko'riladi.