276¹-modda. Ғайриқонуний нарколаборатория ташкил этиш

Гиёҳвандлик воситаларини, психотроп моддаларни ёки уларнинг аналогларини ёхуд кучли таъсир қилувчи моддаларни қонунга хилоф равишда ишлаб чиқариш, тайёрлаш ёки қайта ишлаш учун ғайриқонуний нарколаборатория ташкил этиш ёки сақлаш, — беш йилдан ўн йилгача озодликдан маҳрум қилиш билан жазоланади. Ўша қилмишлар: а) такроран, хавфли рецидивист ёки илгари ушбу Кодекснинг 270 — 276 ва 276² — 276⁸-моддаларида назарда тутилган жиноятларни содир этган шахс томонидан; б) бир гуруҳ шахслар томонидан олдиндан тил бириктириб содир этилган бўлса, — ўн йилдан ўн беш йилгача озодликдан маҳрум қилиш билан жазоланади. Ўша қилмишлар: а) уюшган гуруҳ томонидан ёки унинг манфаатларини кўзлаб; б) икки ёки ундан ортиқ ғайриқонуний нарколабораториялар ташкил этган ҳолда содир этилган бўлса, — ўн беш йилдан йигирма йилгача озодликдан маҳрум қилиш билан жазоланади. Ушбу модданинг биринчи қисмида назарда тутилган қилмишларни содир этган шахс ўз ихтиёри билан айбини бўйнига олиш тўғрисида ҳокимият органларига арз қилса, чин кўнгилдан пушаймон бўлиб, жиноятни очишда фаол ёрдам берган бўлса, жазодан озод қилинади.