238-modda. Kassatsiya shikoyati (protesti) bo'yicha ish yuritishni tugatish

Kassatsiya instantsiyasi sudi kassatsiya shikoyati (protesti) bo'yicha ish yuritishni quyidagi hollarda tugatadi, agar: 1) kassatsiya shikoyati (protesti) ushbu Kodeksga muvofiq kassatsiya tartibida shikoyat qilinmaydigan (protest keltirilmaydigan) sud hujjati ustidan berilgan va u xatoga yo'l qo'yilib, ish yuritishga qabul qilingan bo'lsa; 2) kassatsiya shikoyati (protesti) kassatsiya tartibida ko'rilgan sud hujjati ustidan berilgan va u kassatsiya instantsiyasi sudi tomonidan xatoga yo'l qo'yilib, ish yuritishga qabul qilingan bo'lsa; 3) kassatsiya shikoyati (protesti) sud hujjati ustidan shikoyat qilish (protest keltirish) huquqiga ega bo'lmagan shaxs tomonidan berilgan bo'lsa; 4) shikoyat bergan shaxs tomonidan shikoyatdan voz kechish to'g'risidagi ariza kassatsiya shikoyati ish yuritishga qabul qilingandan keyin kelib tushgan va voz kechish kassatsiya instantsiyasi sudi tomonidan qabul qilingan bo'lsa; 5) protest keltirgan prokuror yoki yuqori turuvchi prokuror tomonidan protestni chaqirib olish to'g'risidagi ariza kassatsiya protesti ish yuritishga qabul qilingandan keyin kelib tushgan bo'lsa; 6) ishda taraf bo'lgan yuridik shaxs kassatsiya shikoyati (protesti) bo'yicha sud hujjati qabul qilinguniga qadar tugatilgan bo'lsa; 7) ishda taraf bo'lgan fuqaro kassatsiya shikoyati (protesti) bo'yicha sud hujjati qabul qilinguniga qadar vafot etsa, nizoli huquqiy munosabat esa huquqiy vorislikka yo'l qo'ymasa. Agar kassatsiya shikoyatida (protestida) shikoyat qilinayotgan (protest keltirilayotgan) hal qiluv qarorini qabul qilgan birinchi instantsiya sudi tomonidan ko'rib chiqish predmeti bo'lmagan yangi talablar arz qilingan bo'lsa, kassatsiya instantsiyasi sudi kassatsiya shikoyatining (protestining) bu talablarga taalluqli qismi bo'yicha ish yuritishni tugatadi. Kassatsiya shikoyati (protesti) bo'yicha ish yuritishni tugatish to'g'risida ajrim chiqariladi, uning ko'chirma nusxasi ishda ishtirok etuvchi shaxslarga ushbu Kodeksning 171-moddasida nazarda tutilgan tartibda yuboriladi. Kassatsiya shikoyati (protesti) bo'yicha ish yuritishni tugatish to'g'risidagi ajrim ustidan taftish shikoyati (protesti) berilishi mumkin. Kassatsiya shikoyati (protesti) bo'yicha ish yuritish tugatilgan taqdirda, ayni bir shaxsning ayni shu asoslar bo'yicha kassatsiya shikoyati (protesti) bilan sudga takroran murojaat qilishiga yo'l qo'yilmaydi.