248-modda. Ish haqining tuzilishi

Ish haqi asosiy (bazaviy) va qo'shimcha (o'zgaruvchan) qismlardan iborat bo'ladi. Ish haqining asosiy (bazaviy) qismi ushbu ish beruvchida amalda bo'lgan mehnatga haq to'lash tizimi asosida belgilanadi va qonunchilikda belgilangan mehnatga haq to'lashning eng kam miqdoridan kam bo'lmasligi kerak. Ish haqining asosiy (bazaviy) qismi uning doimiy tarkibiy qismi bo'lib, xodimga belgilangan mehnat normalariga (tarif stavkalariga, maoshlarga) ko'ra haqiqatda ishlab berilgan vaqt yoki haqiqatda bajarilgan ish uchun hisoblanadi. Ish haqining qo'shimcha (o'zgaruvchan) qismini qo'shimcha to'lovlar, ustamalar, shuningdek mukofotlar va kompensatsiya yoki rag'batlantirish xususiyatiga ega boshqa to'lovlar tashkil etadi.