11-modda. Jamiyatni ta'sis etish tartibi

Jamiyat muassislarning (muassisning) qaroriga ko'ra ta'sis etiladi. Jamiyatni ta'sis etish to'g'risidagi qaror ta'sischilar yig'ilishi tomonidan qabul qilinadi. Jamiyat bir muassis tomonidan ta'sis etilgan taqdirda, jamiyatni ta'sis etish to'g'risidagi qaror shu muassis tomonidan yakka tartibda qabul qilinadi. Jamiyatni tashkil etish to'g'risidagi qarorda jamiyat muassislarining ovoz berish natijalari va ular tomonidan jamiyatni tashkil etish, uning firma nomini, joylashgan yerini va ustav fondi (ustav kapitali) miqdorini belgilash, jamiyat ustavini tasdiqlash to'g'risidagi hamda qonunchilikda taqiqlanmagan boshqa masalalar ko'rsatilishi mumkin. Jamiyatning muassislari ta'sis shartnomasini tuzadi va jamiyat ustavini tasdiqlaydi, bundan ushbu Qonun 12-moddasining ikkinchi qismida nazarda tutilgan hollar mustasno. Jamiyat muassislari jamiyatning ijro etuvchi organlarini saylaydi (tayinlaydi), shuningdek jamiyatning ustav fondiga (ustav kapitaliga) pulsiz hissalar qo'shilgan taqdirda, ularning pulda ifodalangan bahosini tasdiqlaydi, bundan ushbu Qonun 16-moddasining ikkinchi qismida nazarda tutilgan hollar mustasno. Jamiyat ustavini tasdiqlash to'g'risidagi qaror, shuningdek jamiyat muassislari kiritadigan hissalarning pulda ifodalangan bahosini tasdiqlash to'g'risidagi qaror muassislar tomonidan bir ovozdan qabul qilinadi. Boshqa qarorlar ushbu Qonunda va jamiyatning ta'sis hujjatlarida nazarda tutilgan tartibda jamiyat muassislari tomonidan qabul qilinadi. Jamiyatning muassislari jamiyatni ta'sis etish bilan bog'liq bo'lgan va uni davlat ro'yxatidan o'tkazishga qadar yuzaga kelgan majburiyatlar yuzasidan solidar javobgar bo'ladi. Jamiyatning muassislari jamiyatni ta'sis etish bilan bog'liq majburiyatlari yuzasidan faqat ularning harakatlari keyinchalik jamiyat ishtirokchilarining umumiy yig'ilishi tomonidan ma'qullangan taqdirda javobgar bo'ladi.