24-modda. Normativ-huquqiy hujjatlarning va ular loyihalarining korruptsiyaga qarshi ekspertizasi

Normativ-huquqiy hujjatlarning va ular loyihalarining korruptsiyaga qarshi ekspertizasi: korruptsiyaga oid huquqbuzarliklarni sodir etish imkoniyatini yaratadigan, korruptsiyaga sabab bo'ladigan omillarni aniqlashga; korruptsiyaga oid huquqbuzarliklarni sodir etish imkoniyatini yaratadigan loyihani qabul qilish oqibatlarini umumiy baholashga; normativ-huquqiy hujjatlarni qo'llash jarayonida korruptsiya xususiyatiga ega xavflarning yuzaga kelishi ehtimolini prognoz qilishga; korruptsiyaga sabab bo'lgan, aniqlangan omillarni bartaraf etishga qaratilgan tavsiyalarni ishlab chiqishga va choralar ko'rishga yo'naltirilgan jarayondan iborat bo'ladi. Normativ-huquqiy hujjatlarning va ular loyihalarining korruptsiyaga qarshi ekspertizasi «Normativ-huquqiy hujjatlarning va ular loyihalarining korruptsiyaga qarshi ekspertizasi to'g'risida»gi O'zbekiston Respublikasi Qonunida belgilangan tartibda o'tkaziladi.