36-modda. Undiruvni garovga qo'yilgan mol-mulkka qaratish asoslari

Ipotekaga oluvchi ipoteka bilan ta'minlangan majburiyatning bajarilmaganligi yoki lozim darajada bajarilmaganligi, xususan, qarz summasi to'lanmaganligi yoxud o'z vaqtida, to'liq yoki qisman to'lanmaganligi natijasida vujudga kelgan, ushbu Qonunning 7-moddasida nazarda tutilgan talablarni ipoteka to'g'risidagi shartnoma bo'yicha garovga qo'yilgan mol-mulk hisobidan qanoatlantirish uchun undiruvni, agar shartnomada boshqacha tartib nazarda tutilmagan bo'lsa, shu mol-mulkka qaratishga haqli. Agar ipoteka to'g'risidagi shartnomada boshqacha tartib nazarda tutilmagan bo'lsa, davriy to'lovlar bilan bajariladigan majburiyatni ta'minlash uchun undiruvni garovga qo'yilgan mol-mulkka qaratishga, ushbu to'lovlarni to'lash muddatlari ketma-ket uch oydan ortiq muddatga buzilgan taqdirda, yo'l qo'yiladi. Ushbu Qonunning 23, 26 va 28-moddalarida nazarda tutilgan hollarda, ipotekaga oluvchi ipoteka bilan ta'minlangan majburiyat muddatidan oldin bajarilishini talab qilishga, bu talab bajarilmagan taqdirda esa, undiruvni garovga qo'yilgan mol-mulkka qaratishga haqli. Agar ipotekaga qo'yuvchi o'z majburiyatlarini bajarilgan deb hisoblasa hamda o'z huquq va qonuniy manfaatlari himoya qilinishini so'rab sudga murojaat etgan bo'lsa, undiruvni garovga qo'yilgan mol-mulkka qaratish to'xtatib turiladi.