16-modda. Ishlarning yakka tartibda va hay'atda ko'rilishi

Birinchi instantsiya bo'yicha ishlar barcha sudlarda sudya tomonidan yakka tartibda ko'riladi. Ishlarni apellyatsiya, kassatsiya va taftish tartibida ko'rish uch nafar sudyadan iborat tarkibda hay'atda amalga oshiriladi. Ishni O'zbekiston Respublikasi Oliy sudining Rayosatida taftish tartibida ko'rish Rayosat a'zolarining ko'pchiligi ishtirokida hay'atda amalga oshiriladi. Ish hay'atda ko'rilayotganda sudyalardan biri sud majlisida raislik qiladi. Ishni ko'rishda barcha sudyalar teng huquqlardan foydalanadi. Ushbu Kodeksga binoan sudyaga ishni yakka tartibda ko'rish va ayrim masalalarni hal qilish huquqi berilgan taqdirda, sudya sud nomidan ish ko'radi.