75-modda. Xizmat turar joylari

Xususiy, munitsipal, idoraviy uy-joy fondi yoki aniq maqsadli kommunal uy-joy fondining uylarida joylashgan, o'z mehnat munosabatlari xususiyatiga ko'ra ish joyiga bevosita yaqin yerda yashashi kerak bo'lgan fuqarolar ko'chib kirishiga mo'ljallangan turar joylar xizmat turar joylari deb hisoblanadi. Saylab qo'yiladigan lavozimlarni egallab turgan, mehnat shartnomalari bo'yicha ishlayotgan shaxslarga, harbiy xizmatchilarning ayrim toifalariga, shuningdek qonunchilikda belgilangan ro'yxatdagi boshqa shaxslarga beriladigan turar joylar ham xizmat turar joylariga kiritilishi mumkin. Belgilangan tartibda oilaviy bolalar uyi tashkil etilganda tarbiyasiga olingan bolalar bilan birgalikda yashashi uchun tarbiyachi – ota-ona etib tayinlangan fuqarolarga xizmat uyi yoki xizmat kvartirasi beriladi. Xizmat turar joylaridan o'z maqsadida foydalaniladi. Xizmat turar joylari mehnat shartnomasining amal qilish muddatiga yoki xizmat davriga, saylab qo'yiladigan lavozim muddati tugagunga qadar beriladi. Xizmat turar joylarini berish tartibi, shuningdek ularni olish huquqiga ega bo'lgan xodimlar toifalari ro'yxati O'zbekiston Respublikasi Vazirlar Mahkamasi tomonidan belgilanadi.