75-modda. Alohida tartibga solinishi lozim bo'lgan shaharsozlik faoliyati ob'yektlari

Alohida tartibga solinishi lozim bo'lgan shaharsozlik faoliyati ob'yektlari umumdavlat yoki mahalliy ahamiyatga molik bo'lishi mumkin. Shaharsozlik faoliyati quyidagi hollarda alohida tartibga solinishi lozim, agar: hududlar hamda aholi punktlari tabiiy va texnogen xususiyatga ega favqulodda vaziyatlar ta'siriga duchor bo'lgan bo'lsa; hududlar yo'l qo'yiladigan eng yuqori kontsentratsiyalardan ortiqcha kimyoviy va biologik moddalar, zararli mikroorganizmlar, yo'l qo'yiladigan eng yuqori darajalardan ortiqcha miqdorlarda radioaktiv moddalar bilan ifloslangan bo'lsa; shaharsozlik faoliyati muhofaza etiladigan tabiiy hududlarda amalga oshirilayotgan bo'lsa. Alohida tartibga solinadigan shaharsozlik faoliyati ob'yektlari jumlasiga quyidagilar ham kiritilishi mumkin: muhofaza etiladigan noyob landshaftlarga ega hududlar; muhofaza etiladigan tabiiy hududlar; kurort uchun mo'ljallangan hududlar; rekreatsiya uchun mo'ljallangan hududlar; maxsus iqtisodiy zonalarning hududlari; kichik sanoat zonalarining hududlari; suv resurslarining muhofaza zonalari; Toshkent shahri hududi; Nukus shahri hududi; viloyatlarning ma'muriy markazlari bo'lgan shaharlar hududlari; Toshkent va Nukus shaharlariga, viloyatlar va tumanlarning ma'muriy markazlariga tutash zonalar; madaniy meros ob'yektlari mavjud bo'lgan aholi punktlari; kurort aholi punktlari; qo'riqxona aholi punktlari; turistik salohiyatiga ega bo'lgan aholi punktlari; alohida (ekstremal) tabiiy-iqlim sharoitlariga ega bo'lgan aholi punktlari; hayot faoliyatining alohida rejimi belgilangan aholi punktlari (harbiy ob'yektlar va boshqa rejimli hududlar, davlat qo'riqxonalarining hududida hamda boshqa qo'riqlanadigan tabiiy hududlarda joylashgan aholi punktlari).