27-modda. Fuqaroviy va xizmat quroli hamda uning o'q-dorilari egalarining huquq va majburiyatlari

Fuqaroviy va xizmat quroli hamda uning o'q-dorilari egalari quyidagi huquqlarga ega: fuqaroviy va xizmat qurolini hamda uning o'q-dorilarini realizatsiya qilish, kollektsiyalash va ko'rgazmaga qo'yish; fuqaroviy qurol va uning o'q-dorilarini meros qilib olish; fuqaroviy va xizmat qurolidan hamda uning o'q-dorilaridan o'z mo'ljallangan maqsadi bo'yicha foydalanish; tegishli ruxsatnoma bo'lgan taqdirda, fuqaroviy va xizmat qurolini hamda uning o'q-dorilarini saqlash va olib yurish. Fuqaroviy va xizmat quroli hamda uning o'q-dorilari egalari: o'z mulkidagi fuqaroviy qurolni ichki ishlar organlarida ro'yxatdan o'tkazishi (qayta ro'yxatdan o'tkazishi), bundan ushbu Qonun 11-moddasining to'rtinchi qismida ko'rsatilgan hollar mustasno; fuqaroviy va xizmat qurolini hamda uning o'q-dorilarini tashishning ushbu Qonunda belgilangan tartibiga rioya etishi; fuqaroviy va xizmat quroli hamda uning o'q-dorilari but saqlanishini ta'minlashi; qurol to'g'risidagi qonunchilikning talablariga rioya etilishini tekshirish uchun ichki ishlar organlari xodimlarining fuqaroviy va xizmat quroli saqlanadigan ob'yektlar hududiga hamda joylarga soat 6-00 dan 22-00 gacha moneliksiz kirishini ta'minlashi, tanishib chiqish uchun ularga zarur hujjatlarni taqdim etishi; ovchilarning jamoat birlashmasida (ov quroli uchun) va otish sporti sohasidagi faoliyat bilan shug'ullanuvchi yuridik shaxslarda (sport quroli uchun) qurol bilan xavfsiz muomalada bo'lish qoidalariga oid bilimlarining tekshiruvidan o'tishi; ichki ishlar organlarining yo'llanmasi bo'yicha qurolga egalik qilishga qarshi ko'rsatmalar mavjud emasligi yuzasidan tibbiy tekshiruvdan o'tishi; doimiy yashash joyi o'zgargan taqdirda, yangi doimiy yashash joyi bo'yicha ro'yxatga olingan kundan e'tiboran o'n kunlik muddat ichida tegishli ichki ishlar organiga o'ziga tegishli fuqaroviy qurolni qayta ro'yxatdan o'tkazish to'g'risidagi ariza bilan murojaat qilishi shart.