26-modda. Prudentsial normativlarga rioya etish

Ushbu Qonun 8-moddasining ikkinchi qismida ko'rsatilgan mablag'lar hisobidan faoliyatni amalga oshiruvchi mikromoliya tashkilotlari va faktoring tashkilotlari, shuningdek ipotekani qayta moliyalashtirish tashkilotlari va kafolatlar berish tashkilotlari prudentsial normativlarga rioya etishi shart. Prudentsial normativlar quyidagilarni o'z ichiga oladi: kapitalning yetarlilik koeffitsiyentlarini; likvidlilik koeffitsiyentlarini; bir qarz oluvchiga yoki o'zaro aloqador qarz oluvchilar guruhiga doir tavakkalchilikning eng ko'p miqdorini; mikromoliya tashkilotiga kafolatlar berish tashkilotiga yoki faktoring tashkilotiga aloqador bo'lgan shaxslar uchun tavakkalchilikning eng ko'p miqdorini; yuridik shaxslarning ustav fondiga (ustav kapitaliga) va (yoki) qarz qimmatli qog'ozlariga investitsiyalarning eng ko'p miqdorini. Lombardlarning, shuningdek faoliyatni o'z mablag'lari, banklarning kreditlari va o'z ishtirokchilaridan (aktsiyadorlaridan) jalb etilgan qarz mablag'lari hisobidan amalga oshiruvchi mikromoliya tashkilotlarining va faktoring tashkilotlarining prudentsial talablarga rioya etishi talab etilmaydi.