62-modda. Jamiyatni qo'shib olish

Bir yoki bir necha jamiyatni ularning huquqlari va majburiyatlarini boshqa jamiyatga o'tkazgan holda tugatish jamiyatni qo'shib olish deb e'tirof etiladi. Qo'shib olish shaklida qayta tashkil etishda ishtirok etuvchi har bir jamiyat ishtirokchilarining umumiy yig'ilishi bunday qayta tashkil etish to'g'risida, qo'shib olish to'g'risidagi shartnomani tasdiqlash haqida qaror qabul qiladi, qo'shib olinayotgan jamiyat ishtirokchilarining umumiy yig'ilishi esa topshirish dalolatnomasini tasdiqlash to'g'risida ham qaror qabul qiladi. Qo'shib olishda ishtirok etuvchi jamiyatlar ishtirokchilarining qo'shma umumiy yig'ilishi qo'shib olinayotgan jamiyatning ta'sis hujjatlariga jamiyatning ishtirokchilari tarkibi o'zgarishi, ularning ulushlari miqdorlarini belgilash bilan bog'liq o'zgartirishlarni, qo'shib olish to'g'risidagi shartnomada nazarda tutilgan boshqa o'zgartirishlarni kiritadi, shuningdek zarur bo'lganda boshqa masalalarni, shu jumladan birlashtirilayotgan jamiyatning organlarini saylash to'g'risidagi masalalarni hal etadi. Bunday umumiy yig'ilishni o'tkazish muddatlari va tartibi qo'shib olish to'g'risidagi shartnomada belgilanadi. Bir jamiyat boshqasiga qo'shib olinganda qo'shib olinayotgan jamiyatning barcha huquqlari va majburiyatlari qo'shib olayotgan jamiyatga o'tadi.