106-modda. Yukning yoki qo'l yukining olinmasligi va kechikib olinishi

Agar qabul qiluvchi yetib kelgan yukni tashish qoidalarida belgilangan muddatda talab qilib olmasa yoki uni olishdan voz kechsa, tashuvchi jo'natuvchini bu haqda xabardor qilgan holda yukni jo'natuvchining hisobidan saqlash uchun o'zida qoldirishga haqlidir. Qabul qiluvchi xabardor qilingan kundan boshlab 30 kun ichida yuk olib ketilmagan va bu yukka nisbatan yuk jo'natuvchining biror-bir farmoyishi olinmagan bo'lsa, bunday yuk talab qilib olinmagan deb hisoblanadi va O'zbekiston Respublikasi qonunchiligida belgilangan tartibda realizatsiya qilinadi. Uchib kelgan reys yo'lovchilariga qo'l yuki topshirilganidan keyin talab qilib olinmagan qo'l yuki uni olib kelgan tashuvchi hisobidan saqlash va bunday qo'l yukining egasini qidirish hamda uni egasiga yetkazib berishni tashkil etish uchun aeroportning tegishli xizmatiga topshiriladi. Tashuvchilar tomonidan olib kelinib, talab qilib olinmagan qo'l yuki aeroportda ko'pi bilan 3 oy saqlanadi va keyin O'zbekiston Respublikasining qonunchiligida belgilangan tartibda yo'q qilinadi. Chet ellik tashuvchilar tomonidan olib kelinib, talab qilib olinmagan qo'l yuki aeroportda ko'pi bilan 7 kun saqlanadi va uni olib kelgan tashuvchining reysi bilan qaytarib yuboriladi. Talab qilib olinmagan qo'l yukidagi tez buziladigan narsalar buzilish belgilari aniqlangan taqdirda, O'zbekiston Respublikasining qonunchiligida belgilangan tartibda yo'q qilinadi.