226-modda. Da'vogarning arz qilgan talablaridan voz kechishi, javobgarning da'vogar talablarini tan olishi, taraflarning kelishuv bitimi yoki mediativ kelishuvi

Da'vogarning arz qilgan talablaridan voz kechganligi, javobgarning da'vogar talablarini tan olganligi yoki taraflarning kelishuv bitimi shartlari sud nomiga yo'llangan, ishga qo'shib qo'yiladigan yozma arizalarida ifoda etilgan bo'lishi lozim bo'lib, bu haqda sud majlisi bayonnomasida ko'rsatiladi. Mediativ kelishuv sudga alohida hujjat tarzida taqdim etiladi va ishga qo'shib qo'yiladi, bu haqda sud majlisining bayonnomasida ko'rsatiladi. Da'vogarning arz qilgan talablaridan voz kechganligini qabul qilishdan yoki taraflarning kelishuv bitimini tasdiqlashdan oldin sud da'vogarga yoki taraflarga tegishli protsessual harakatlarni amalga oshirish oqibatlarini tushuntiradi. Da'vogarning arz qilgan talablaridan voz kechganligini qabul qilish to'g'risida yoki taraflarning kelishuv bitimini tasdiqlash haqida sud ajrim chiqaradi, bir vaqtning o'zida ushbu ajrim bilan ish yuritishni tugatadi. Arz qilingan talablar javobgar tomonidan tan olingan va bu sud tomonidan qabul qilingan taqdirda, ularni qanoatlantirish to'g'risida hal qiluv qarori chiqariladi. Sud tomonidan javobgarning arz qilingan talablarni tan olishi qabul qilinmagan yoki taraflarning kelishuv bitimini tasdiqlash rad qilingan taqdirda, sud bu haqda ajrim chiqaradi va ishni mazmunan ko'radi.