73-modda. Субсидиар жавобгарликка тортиш тўғрисидаги аризани кўриб чиқиш

Субсидиар жавобгарликка тортиш тўғрисидаги ариза ушбу бобда белгиланган тартибда суд томонидан кўриб чиқилади. Аризада кўрсатилган шахс қарздорнинг ишларини бошқарувчи эканлиги тўғрисида етарли маълумот мавжуд эмаслиги аниқланса, суд субсидиар жавобгарликка тортишни рад этиши мумкин. Субсидиар жавобгарликка тортиладиган шахсга нисбатан тўловга қобилиятсизлик тўғрисида иш қўзғатилган тақдирда, ушбу шахсни жавобгарликка тортиш масаласи тўловга қобилиятсизлик тўғрисидаги иш доирасида кўриб чиқилади. Агар ушбу Қонуннинг 70-моддасида назарда тутилган асослар бўйича субсидиар жавобгарликка тортиш тўғрисидаги аризани кўриб чиқиш жараёнида субсидиар жавобгарлик миқдорини аниқлаш мумкин бўлмаса, суд аризани кўриб чиқишни субсидиар жавобгарликка тортиш учун зарур бўлган барча далиллар аниқлангунига ва кредитор билан ҳисоб-китоблар тугагунига қадар тўхтатиб туриш тўғрисида ажрим чиқаради. Ушбу ажрим устидан шикоят берилиши (протест келтирилиши) мумкин. Агар суд томонидан аризани кўриб чиқиш жараёнида даъвони таъминлаш тўғрисида ажрим чиқарилган бўлса, ушбу аризани кўриб чиқиш тўхтатиб турилган даврда ҳам даъвони таъминлаш чоралари амал қилади. Кредиторлар билан ҳисоб-китоблар якунланганидан сўнг қарздорнинг мол-мулки етарли эмаслиги сабабли кредиторларнинг талаблари қаноатлантирилмаган тақдирда, тугатиш бошқарувчиси тугатишга доир иш юритиш тартиб-таомилини ўтказиш натижалари тўғрисидаги ҳисоботни, шунингдек кредиторлар йиғилишининг кредиторларнинг қаноатлантирилмаган талаблари миқдори тўғрисидаги қарорини илова қилган ҳолда субсидиар жавобгарликка тортиш тўғрисидаги ишни тиклаш ҳақидаги ариза билан судга мурожаат қилади. Субсидиар жавобгарлик миқдорини белгилаш тўғрисидаги масала ва тугатишга доир иш юритиш тартиб-таомилини ўтказиш натижалари ҳақидаги тугатиш бошқарувчисининг ҳисоботи суд томонидан кўриб чиқилади.