27-modda. Тўловга қобилиятсизлик тўғрисидаги иш билан боғлиқ харажатлар

Тўловга қобилиятсизлик тўғрисидаги иш билан боғлиқ харажатларнинг ўрни, агар ушбу Қонунда бошқача қоида назарда тутилмаган бўлса, қарздорнинг мол-мулки ҳисобидан қопланади. Суд бошқарувчиси ўз ҳуқуқ ва мажбуриятларининг бажарилишини таъминлаш мақсадида шартнома асосида жалб этилган шахсларга ҳақ тўлашни, суд харажатларини, қарздорнинг кўчмас мулкка бўлган ҳуқуқини давлат рўйхатидан ўтказиш, мол-мулкини хатловдан ўтказиш, баҳолаш харажатларини, зарур ҳолларда, аудитор хизматларидан фойдаланганлик харажатларини, аукцион харажатларини, ҳужжатларни сақлашга топшириш харажатларини, шунингдек тўловга қобилиятсизлик тўғрисидаги ишни юритиш билан боғлиқ бошқа харажатларни тўлашни амалга ошириши мумкин. Тўловга қобилиятсизлик тўғрисидаги ишга суд бошқарувчиси томонидан жалб этилган шахсларнинг хизматларига тўланадиган ҳақнинг миқдори қарздор активлари баланс қийматининг базавий ҳисоблаш миқдорига (бундан буён матнда БҲМ деб юритилади) нисбатан ҳисоб-китоб қилинган суммадан келиб чиқиб (бундан ушбу Қонуннинг 26-моддасида назарда тутилган харажатлар мустасно), агар баланс қийматининг суммаси: БҲМнинг минг бараваригача бўлса — қарздор активлари баланс қийматининг ўн икки фоизидан кўп бўлмаган миқдорда; БҲМнинг минг бараваридан беш минг бараваригача бўлса — қарздор активлари баланс қийматининг ўн фоизидан кўп бўлмаган миқдорда; БҲМнинг беш минг бараваридан ўн минг бараваригача бўлса — қарздор активлари баланс қийматининг саккиз фоизидан кўп бўлмаган миқдорда; БҲМнинг ўн минг бараваридан ортиқ бўлса — қарздор активлари баланс қийматининг беш фоизидан кўп бўлмаган миқдорда фоизларда белгиланади. Бунда харажатлар БҲМнинг кўпи билан икки минг икки юз бараваридан ошмаслиги керак. Ушбу модданинг мақсадлари учун қарздор активларининг баланс қиймати тўловга қобилиятсизлик тўғрисидаги иш қўзғатилишидан олдинги охирги ҳисобот санасидаги молиявий ҳисоботлар асосида аниқланади. Қарздор активларининг ҳақиқий баланс қийматини аниқлаш имкони бўлмаган ҳолларда у баҳоловчи ташкилот томонидан белгиланган баҳолаш қиймати асосида аниқланади. Ушбу қоидалар суд санацияси ва ташқи бошқарув тартиб-таомилларига нисбатан қўлланилмайди. Қарздорнинг тўловга қобилиятсизлиги тўғрисидаги иш билан боғлиқ харажатлар ҳақидаги маълумотлар тегишинча суд санацияси, ташқи бошқарув ва тугатиш, шунингдек қарзни таркибий жиҳатдан ўзгартириш ва мол-мулкни сотиш режасида акс эттирилади. Гаровга қўйилган мол-мулкни сотиш билан боғлиқ харажатлар, агар кредиторлар йиғилишида ёки кредиторлар қўмитаси мажлисида бошқача қоида белгиланмаган бўлса, гаров билан таъминланган кредитор томонидан амалга оширилади.