32-modda. Ta'lim tashkilotining ustavi

Ta'lim tashkilotining ustavi ta'lim turlarining o'ziga xos xususiyatlarini inobatga olgan holda ishlab chiqiladi. Ta'lim tashkilotining ustavida, qoida tariqasida, quyidagilar ko'rsatiladi: ta'lim turi va shakli; ta'lim tashkilotining maqsad va vazifalari; o'quv-tarbiyaviy va ilmiy-metodik ishlarni tashkil etish hamda mazmuni; ta'lim tashkilotiga qabul qilish tartibi; ta'lim tashkilotining tuzilmasi, boshqaruv organlari va jamoatchilik tuzilmalari; ta'lim oluvchilar, pedagog kadrlar, o'quv-tarbiya ishlari bo'yicha xodimlar, ma'muriy-boshqaruv xodimlarining maqomi, huquqlari va majburiyatlari; ta'lim tashkilotining mol-mulki va vositalari; ta'lim tashkilotini tashkil etish, qayta tashkil etish va tugatish tartibi. Ta'lim tashkilotining namunaviy ustavi: umumiy o'rta ta'lim tashkilotlari, Prezident, ijod va ixtisoslashtirilgan maktablar hamda bolalar uchun qo'shimcha ta'lim tashkilotlari uchun — O'zbekiston Respublikasi Maktabgacha va maktab ta'limi vazirligi tomonidan; oliy ta'lim tashkilotlari huzuridagi ixtisoslashtirilgan maktablar, o'rta maxsus, professional va oliy ta'lim tashkilotlari, shuningdek katta yoshdagilar uchun qo'shimcha ta'lim tashkilotlari uchun — O'zbekiston Respublikasi Oliy ta'lim, fan va innovatsiyalar vazirligi tomonidan; kadrlarni qayta tayyorlash va ularning malakasini oshirish bo'yicha ta'lim tashkilotlari uchun — tegishli vazirliklar va idoralar tomonidan ishlab chiqiladi. Ta'lim tashkilotining ustavi ta'lim tashkilotining ta'sischilari tomonidan tasdiqlanadi va hududiy tegishlilik bo'yicha Davlat xizmatlari markazi tomonidan ro'yxatga olinadi.