40-modda. Tekshirishni amalga oshirayotgan mansabdor shaxslarga doir talablar

Tadbirkorlik faoliyati sub'yektlarining faoliyatini tekshirish nazorat qiluvchi va huquqni muhofaza qiluvchi organlarning mansabdor shaxslari tomonidan amalga oshiriladi. Nazorat qiluvchi organlar mansabdor shaxslarining tadbirkorlik faoliyati sub'yektlari faoliyatini tekshirishga kirishishiga ushbu shaxslarda nazorat qiluvchi organlar faoliyatini muvofiqlashtirish bo'yicha maxsus vakolatli organ tomonidan tasdiqlangan tekshirishlarni o'tkazish rejasidan ko'chirma yoki shu organ qabul qilgan rejadan tashqari yoxud muqobil tekshirish o'tkazish to'g'risidagi qarorning ko'chirma nusxasi, shuningdek nazorat qiluvchi organning tekshirish o'tkazish to'g'risidagi, tekshiruvchi mansabdor shaxslarning tarkibi hamda tekshirishni o'tkazish muddatlari ko'rsatilgan buyrug'ining ko'chirma nusxasi, tekshiruvchi mansabdor shaxslarning tekshirishlarni o'tkazishga ruxsat berilganligi to'g'risidagi maxsus guvohnomasi va shaxsiy guvohnomasi bo'lganda yo'l qo'yiladi. Tadbirkorlik sub'yektlarining faoliyati tekshirilayotganda nazorat qiluvchi va huquqni muhofaza qiluvchi organlarning mansabdor shaxslari tekshirishlarni ro'yxatga olish kitobiga qonun hujjatlarida belgilangan tartibda tegishli yozuvni kiritadilar.