19-modda. Qurol bilan mukofotlash

Maxsus organlarning va harbiy tuzilmalarning harbiy xizmatchilari hamda xodimlari ularning rahbarlari buyruqlari asosida olgan qurol, shuningdek O'zbekiston Respublikasi fuqarolari tomonidan O'zbekiston Respublikasi Prezidentining va O'zbekiston Respublikasi Vazirlar Mahkamasining qarorlari, chet davlatlar rahbarlarining hamda chet davlatlar hukumatlari rahbarlarining mukofotlashga oid hujjatlari asosida olingan qurol mukofot qilingan quroldir. Mukofot qilingan qurolni saqlashga va olib yurishga doir ruxsatnoma ichki ishlar organlari tomonidan beriladi. Mukofot qilingan qurolni saqlash va olib yurishga doir ruxsatnomaning amal qilish muddati cheklanmaydi. Qatorasiga o'q uzish imkoniyatini beradigan, shuningdek ushbu Qonunning 9-moddasiga binoan O'zbekiston Respublikasi hududida muomalasi taqiqlangan qurol mukofot qilinadigan qurol bo'lishi mumkin emas. O'zbekiston Respublikasi fuqarosi qatorasiga o'q uzish imkoniyatini beradigan, shuningdek ushbu Qonunning 9-moddasiga binoan O'zbekiston Respublikasi hududida muomalasi taqiqlangan qurol bilan mukofotlangan taqdirda, ushbu qurol olingan kundan e'tiboran bir kunlik muddatda ichki ishlar organiga topshirilishi lozim. Mukofotga berilgan jangovar yoki xizmat qurolini sotishga va meros qilib olishga, shuningdek uning o'q dorilarini olishga yo'l qo'yilmaydi.