402-modda. O'n ikki yoshga to'lmagan bolalarning yoki o'n olti yoshga to'lmagan nogironligi bo'lgan bolaning ota-onasidan birining (ota-ona o'rnini bosuvchi shaxsning) ish haqi saqlanmagan holda ta'til olish huquqi

O'n ikki yoshga to'lmagan ikki nafar va undan ortiq bolaning yoki o'n olti yoshga to'lmagan nogironligi bo'lgan bolaning ota-onasidan biriga (ota-ona o'rnini bosuvchi shaxsga), ularning xohishiga ko'ra, har yili ish haqi saqlanmagan holda davomiyligi o'n to'rt kalendar kungacha bo'lgan ta'til beriladi. Ushbu moddaning birinchi qismida nazarda tutilgan ta'til yillik mehnat ta'tiliga qo'shib berilishi yoki ish beruvchi bilan kelishib belgilanadigan davrda ushbu ta'tildan alohida (to'liq yoxud qismlarga bo'lib), lekin faqat joriy ish yili davomida foydalanilishi mumkin. Ushbu ta'tilni keyingi ish yiliga ko'chirishga yo'l qo'yilmaydi.