17-modda. Litsenziya berganlik, uning amal qilish muddatini uzaytirganlik va uni o'zgartirganlik uchun undiriladigan davlat boji

Litsenziya berganlik, uning amal qilish muddatini uzaytirganlik va uni o'zgartirganlik uchun davlat boji undiriladi. Litsenziya berganlik, uning amal qilish muddatini uzaytirganlik va uni o'zgartirganlik uchun davlat boji miqdorlari hamda uni to'lash tartibi «Davlat boji to'g'risida»gi O'zbekiston Respublikasi Qonunida belgilanadi. Litsenziyalanadigan faoliyat turining kichik turi uchun litsenziya berganlik va uning amal qilish muddatini uzaytirganlik uchun qonunda davlat boji stavkalarining kamaytirilgan miqdorlari belgilanishi mumkin. Faoliyatning quyidagi turlari bo'yicha litsenziyaning amal qilishi uchun yillik davlat bojlari belgilanadi: kontsert-tomosha faoliyati; iste'mol va texnik etil spirti, alkogol mahsulotlari ishlab chiqarish; alkogol mahsulotlarining ulgurji savdosi sohasidagi faoliyat; telekommunikatsiyalar tarmoqlarini loyihalashtirish, qurish, ulardan foydalanish va ularning xizmatlarini ko'rsatish; bukmekerlik faoliyati; Internet jahon axborot tarmog'ida tavakkalchilikka asoslangan o'yinlarni tashkil etish faoliyati.