372⁵-modda. Apellyatsiya, kassatsiya, taftish instantsiyasi sudi ajrimining, qarorining mazmuni

Apellyatsiya, kassatsiya, taftish instantsiyasi sudining ajrimida, qarorida quyidagilar ko'rsatilishi kerak: 1) ishning raqami, ajrim, qaror chiqarilgan vaqt va joy; 2) ajrim, qaror qabul qilgan sudning nomi va tarkibi; 3) taraflar va ishda ishtirok etuvchi boshqa shaxslarning ishtiroki to'g'risidagi ma'lumotlar; 4) ish kimning shikoyati (protesti) bo'yicha ko'rib chiqilganligi; 5) shikoyat qilingan (protest keltirilgan) sud hujjatining nomi va uning qisqacha mazmuni; 6) shikoyatda (protestda) bayon etilgan vajlar, taqdim etilgan materiallarning qisqacha mazmuni, ishni ko'rishda ishtirok etgan shaxslarning tushuntirishlari, prokurorning fikri; 7) apellyatsiya, kassatsiya yoki taftish instantsiyasi sudi xulosaga kelishiga asos bo'lgan sabablar hamda sud amal qilgan moddiy va protsessual huquq normalariga havola; 8) ajrimning, qarorning xulosa qismi. Apellyatsiya, kassatsiya, taftish instantsiyasi sudining ajrimi, qarori ishni ko'rgan sudyalar tomonidan imzolanadi. O'zbekiston Respublikasi Oliy sudi Rayosatining qarori majlisda raislik qiluvchi tomonidan imzolanadi. Sud shikoyatni (protestni) rad qilgan taqdirda o'z ajrimida, qarorida qaysi sabablarga ko'ra shikoyatdagi (protestdagi) vajlar noto'g'ri deb yoki sud hujjatini bekor qilish yoxud o'zgartirish uchun asos bo'lmaydi deb topilganligini ko'rsatishi shart.