50-modda. Qimmatli qog'ozlar bozorida maxfiy axborotni oshkor qilish

Qimmatli qog'ozlar bozorida maxfiy axborotni oshkor qilish qonunda nazarda tutilgan hollarda va tartibda amalga oshiriladi. Mijozlarning hisobvaraqlari bo'yicha ma'lumotlar — ularning o'zlariga yoki vakillariga, o'z vakolatlariga taalluqli masalalar yuzasidan — monopoliyaga qarshi davlat organiga, davlat soliq xizmati organlariga, O'zbekiston Respublikasi Prezidenti huzuridagi Ijtimoiy himoya milliy agentligiga va «Inson» ijtimoiy xizmatlar markazlariga, O'zbekiston Respublikasi Bosh prokuraturasi huzuridagi Majburiy ijro byurosiga, sudlarga, qo'zg'atilgan jinoyat ishi bo'lgan taqdirda esa, tergov va surishtiruv organlariga beriladi. Mijozlarning — jismoniy shaxslarning hisobvaraqlari bo'yicha ma'lumotlar ularning egalari vafot etgan taqdirda, merosxo'rlarga yoki hisobvaraqning egasi ko'rsatgan shaxslarga, o'z ish yurituvidagi meros ishlari yuzasidan notarial idoralarga beriladi, chet el fuqarolariga nisbatan esa chet davlatning konsullik muassasalariga beriladi. Birja bitimining mazmuni haqidagi axborot sudlarga taqdim etiladi, tergov va surishtiruv organlariga esa qo'zg'atilgan jinoyat ishi mavjud bo'lgan taqdirda taqdim etiladi. Maxfiy axborot qimmatli qog'ozlar bozorini tartibga solish bo'yicha vakolatli davlat organiga quyidagi hollarda: u qimmatli qog'ozlar bozori to'g'risidagi qonunchilik buzilganligi faktlarini ko'rib chiqayotganda; u Qimmatli qog'ozlar komissiyalari xalqaro tashkiloti a'zolari bo'lgan boshqa davlatlarning qimmatli qog'ozlar bozorini tartibga solish bo'yicha vakolatli organlariga ularning yozma so'roviga ko'ra axborot berganda oshkor qilinadi. Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg'in qurolini tarqatishni moliyalashtirishga qarshi kurashish bilan bog'liq maxfiy axborot qonunchilikda nazarda tutilgan hollarda va tartibda maxsus vakolatli davlat organiga taqdim etiladi.