149-modda. Jazoni ijro etish tartibi

Intizomiy qismga jo'natish tariqasidagi jazo O'zbekiston Respublikasi Mudofaa vazirligining shunga maxsus mo'ljallangan harbiy qismlari (intizomiy qism) tomonidan ijro etiladi. Mahkumlarni intizomiy qismga jo'natish va bu qismlarda qabul qilib olish qonunchilikda belgilangan tartibda amalga oshiriladi. Jazoni intizomiy qismda o'tash davrida barcha mahkumlar, harbiy unvonlari, lavozimlari va avvalgi xizmatlari xususiyatidan qat'i nazar, soldatlar (matroslar) holatida bo'ladilar hamda belgilangan ko'rinishdagi kiyimda yuradilar va tafovut belgilarini taqadilar. Intizomiy qismda jazoni o'tayotgan harbiy xizmatchilar mahkumlar uchun ushbu Kodeks va boshqa qonunchilik hujjatlarida belgilab qo'yilgan rejim talablariga rioya etishlari shart.