17-modda. Garov xatining shartlarini o'zgartirish

Ipoteka bilan ta'minlangan majburiyat bo'yicha qarzdor, ipotekaga qo'yuvchi va garov xatining qonuniy egasi garov xatining ilgari belgilangan shartlarini kelishuvga ko'ra o'zgartirishlari mumkin. Bu holda, shuningdek ipoteka bilan ta'minlangan majburiyat bo'yicha qarz boshqa shaxsga o'tkazilayotganda kelishuvda garov xatini bekor qilish va shu bilan bir vaqtda tegishli o'zgartirishlar hisobga olingan holda tuzilgan yangi garov xatini berish nazarda tutilishi kerak. Elektron garov xatiga o'zgartirishlar kiritish garov xatining qonuniy egasi va garovga qo'yuvchi tomonidan elektron garov xatiga o'zgartirishlar kiritish to'g'risidagi kelishuv (qo'shimcha kelishuv) shaklini Yagona interaktiv davlat xizmatlari portalida to'ldirish orqali amalga oshiriladi. Garov xatining mazmunini o'zgartirish to'g'risidagi kelishuvni ariza beruvchi davlat ro'yxatidan o'tkazishni so'rab ro'yxatdan o'tkazuvchi organga murojaat etgan paytdan e'tiboran bir ish kuni ichida amalga oshirilishi kerak. Bunday kelishuvni davlat ro'yxatidan o'tkazish bepul amalga oshiriladi. Hujjatli garov xati bekor qilingan va shu bilan bir vaqtda yangi garov xati berilgan taqdirda, ipotekaga qo'yuvchi ro'yxatdan o'tkazuvchi organga binolar (inshootlar) garovi davlat reyestriga o'zgartirishlar kiritish haqidagi ariza bilan birgalikda yangi garov xatini beradi, bu garov xati ipotekaga oluvchiga uning qonuniy egaligida turgan garov xati o'rniga topshiriladi. Bekor qilingan hujjatli garov xati ro'yxatdan o'tkazuvchi organ idoraviy arxivida ipoteka to'g'risidagi qayd yozuvi o'chirilguniga qadar saqlanadi. Bekor qilingan elektron garov xati o'rniga berilgan yangi elektron garov xati ro'yxatdan o'tkazuvchi organ tomonidan «Qimmatli qog'ozlar markaziy depozitariysi» aktsiyadorlik jamiyatiga va elektron garov xatining qonuniy egasiga yuboriladi.