1-modda. Iqtisodiy sud ishlarini yuritish to'g'risidagi qonunchilik

Iqtisodiy sud ishlarini yuritish to'g'risidagi qonunchilik ushbu Kodeks va boshqa qonunchilik hujjatlaridan iboratdir. O'zbekiston Respublikasining Konstitutsiyaviy Qonuni bilan maxsus huquqiy rejim o'rnatilgan hududda iqtisodiy ishlar ushbu Kodeksda belgilanganidan boshqacha qoidalarga muvofiq ixtisoslashgan sud tomonidan ko'rib chiqiladi va hal etiladi. Iqtisodiy sud ishlarini yuritish to'g'risidagi qonunchilik buyruqqa, da'vo ishini yuritishga oid va alohida toifadagi ishlarni ko'rib chiqish tartibini belgilaydi. Agar O'zbekiston Respublikasining xalqaro shartnomasida O'zbekiston Respublikasi qonunchiligida nazarda tutilganidan boshqacha qoidalar belgilangan bo'lsa, xalqaro shartnoma qoidalari qo'llaniladi.