300¹-modda. Savdo-iqtisodiy munosabatlarda eng ko'p qulaylik berish rejimini qo'llash

Boj tarifi bilan belgilangan stavkalar miqdoridagi bojxona bojlari, tovarni jo'natuvchi va eksport qiluvchi mamlakatdan qat'i nazar, O'zbekiston Respublikasi savdo-iqtisodiy munosabatlarida eng ko'p qulaylik berish rejimini qo'llayotgan mamlakatlarda ishlab chiqarilgan tovarlarga nisbatan qo'llaniladi. Savdo-iqtisodiy munosabatlarda eng ko'p qulaylik berish rejimi nazarda tutilmagan mamlakatlarda ishlab chiqarilgan yoxud ishlab chiqarilgan mamlakati aniqlanmagan tovarlarga nisbatan boj tarifidan tashqari quyidagi miqdorlarda qo'shimcha bojxona boji undiriladi: bojxona bojining advalor stavkasi turi o'n foizgacha bo'lgan tovarlarga nisbatan — besh foiz; bojxona bojining advalor stavkasi o'n foizdan yigirma foizgacha bo'lgan tovarlarga nisbatan — o'n foiz; bojxona bojining advalor stavkasi yigirma foizdan o'ttiz foizgacha bo'lgan tovarlarga nisbatan — o'n besh foiz; bojxona bojining advalor stavkasi o'ttiz foiz va undan yuqori bo'lgan tovarlarga nisbatan — yigirma foiz.